Ləğv edilmiş Azərbaycan Yüksəliş Partiyasının (AY Partiya) keçmiş sədri Anar Əsədlinin cinayət işi üzrə məhkəmə prosesi yekunlaşıb.

Mayın 22-də Bakı Ağır Cinayətlər Məhkəməsində hakim Elnur Nuriyevin sədrliyi ilə keçirilən iclasda hökm elan olunub. Məhkəmə Anar Əsədlini həbsdə keçirdiyi müddət nəzərə alınmaqla 4 il 6 ay müddətinə azadlıqdan məhrum edib.

Bundan əvvəl dövlət ittihamçısı onun 7 il müddətinə azadlıqdan məhrum edilməsini istəmişdi. İş üzrə zərərçəkmiş qismində tanınan Oqtay Qasımov və Etibar Nəsibov da ittiham tərəfinin mövqeyi ilə razı olduqlarını bildiriblər.

Müdafiə tərəfi isə ittihamları qəbul etməyib. Vəkil Rəsul Cəfərov məhkəmədə bildirib ki, Anar Əsədli zərərçəkmiş şəxslərdən borc alıb və bu məsələ cinayət deyil, mülki münasibət kimi qiymətləndirilməlidir. Müdafiə tərəfi bəraət hökmü tələb edib.

Son sözündə Anar Əsədli də özünü təqsirli bilmədiyini deyib.

Keçmiş partiya sədri Cinayət Məcəlləsinin 178.3.2-ci maddəsi ilə — külli miqdarda ziyan vurmaqla dələduzluqda təqsirli bilinib.

Anar Əsədli ilk dəfə 2023-cü ilin aprelində həbs olunmuşdu. Həmin ilin iyulunda ev dustaqlığına buraxılmış, oktyabr ayında isə cinayət işinə xitam verilmişdi. Sonradan Baş Prokurorluq həmin qərarı ləğv edərək işi yenidən istintaqa qaytarıb. O, 2025-ci il oktyabrın 24-də məhkəmə zalında eyni iş üzrə yenidən həbs edilib.

Anar Əsədli 2020-ci ildə Azərbaycan Yüksəliş Partiyasının sədri seçilmişdi. Partiya 2021-ci ildə dövlət qeydiyyatından keçsə də, 2023-cü ilin iyununda fəaliyyətini dayandırdığını elan edib.

Şuşa Şəhəri Dövlət Qoruğu İdarəsi daha iki tikinti tenderinin nəticələrini açıqlayıb. Məlumata görə, hər iki satınalmanın qalibi “DİLER İNŞAAT” QSC seçilib.

Tenderlər Şuşa şəhərinin D-5 yaşayış massivində çoxmənzilli yaşayış binalarının tikintisini əhatə edir. Birinci layihə çərçivəsində 6 ədəd dördmərtəbəli yaşayış binasının inşası nəzərdə tutulur. Bu işlər üçün şirkətə 12 milyon 984 min manat ayrılacaq.

İkinci layihə isə həmin massivdə 8 dördmərtəbəli yaşayış binasının tikintisini əhatə edir. Bu müqavilənin dəyəri 24 milyon 76 min manat təşkil edir.

Beləliklə, “DİLER İNŞAAT”ın son iki tender üzrə əldə etdiyi müqavilələrin ümumi məbləği 37 milyon manatı ötür.

Qeyd edək ki, bundan təxminən üç həftə əvvəl də Şuşa Şəhəri Dövlət Qoruğu İdarəsi D-3 massivində yeddi yaşayış binasının tikintisi və ərazinin abadlaşdırılması işlərini “DİLER İNŞAAT” QSC-yə həvalə etmişdi. Həmin layihənin dəyəri 29 milyon 373 min manat olub.

2016-cı ildə qeydiyyata alınmış “DİLER İNŞAAT” QSC-nin hüquqi ünvanı Bakı şəhəri, Yasamal rayonu, Moskva prospekti 73A göstərilir. Şirkətin nizamnamə kapitalı 2010 manatdır, qanuni təmsilçisi isə Elxan Süleymanovdur.

Açıq məlumatlara əsasən, şirkətin hazırda dövlət büdcəsinə 25 min 861 manat məbləğində vergi borcu olduğu göstərilir.

Mediada “DİLER İNŞAAT”ın deputat ailəsi ilə əlaqələri barədə məlumatlar dərc olunsa da, bu barədə rəsmi təsdiq təqdim edilməyib.

Həbsdə olan keçmiş deputat Nazim Bəydəmirlinin ailəsi onun səhhəti ilə bağlı narahatlıq ifadə edib. Həyat yoldaşı Fəridə Bəydəmirlinin sözlərinə görə, mayın 15-dən etibarən ona qida və dərman qəbul etməyə icazə verilmir.

Fəridə Bəydəmirli bildirib ki, həyat yoldaşı əvvəlcə bir sutka günəş altında ayaqüstə saxlanılıb, daha sonra isə cərimə kamerasına (“kars”) yerləşdirilib.

“Nazimin həyatından ciddi narahatıq. Onu öldürməyə çalışırlar”, – deyə o bildirib.

Onun sözlərinə görə, 13 saylı cəzaçəkmə müəssisəsində Nazim Bəydəmirliyə qarşı digər məhbus tərəfindən təxribat xarakterli davranışlar olub və bununla bağlı müəssisə rəhbərliyinə edilən müraciətlər nəticəsiz qalıb.

Ailə keçmiş deputatın səhhətində ciddi problemlərin olduğunu, mütəmadi dərman qəbul etməli olduğunu bildirərək vəziyyətə müdaxilə olunmasını tələb edir.

Nazim Bəydəmirli 2023-cü ilin iyulunda həbs edilib. O, ittihamları rədd edir və həbsinin Söyüdlü hadisələri ilə əlaqəli olduğunu bildirir. 2024-cü ilin sentyabrında məhkəmə onu 8 il azadlıqdan məhrum edib.

Laçın şəhərində yeni yaşayış məhəlləsinin tikintisi üçün ayrılmış 41 milyon 266 min manatlıq dövlət tenderinin qalibi “Hovers Group” MMC olub. Satınalmanın sifarişçisi “Laçın rayonunda Bərpa, Tikinti və İdarəetmə Xidməti” publik hüquqi şəxsidir.

Araşdırmalar göstərir ki, şirkətin təsisçisi Səbuhi Mehdizadə hazırda Cəbrayıl, Qubadlı və Zəngilan rayonlarında Prezidentin xüsusi nümayəndəsinin müavini vəzifəsində çalışır. O, bu vəzifəyə 2024-cü ilin iyulunda prezident İlham Əliyevin sərəncamı ilə təyin edilib.

Səbuhi Mehdizadə bundan əvvəl müxtəlif dövlət qurumlarında, o cümlədən Kənd Təsərrüfatı Nazirliyi və “Təmiz Şəhər” ASC-də rəhbər vəzifələrdə işləyib. Hazırda o, həm də Stolüstü Tennis Federasiyasının vitse-prezidentidir.

“Hovers Group” MMC son illərdə dövlət qurumlarından iri məbləğli sifarişlər alıb. Şirkət MİDA, Gənclər və İdman Nazirliyi, Məcburi Köçkünlərin Sosial İnkişaf Fondu və digər dövlət qurumları ilə ümumi dəyəri on milyonlarla manat olan müqavilələr imzalayıb.

Azərbaycan qanunvericiliyi dövlət qulluqçularının sahibkarlıq fəaliyyəti ilə məşğul olmasını qadağan edir. “Dövlət qulluğu haqqında”, “Sahibkarlıq fəaliyyəti haqqında” və “Korrupsiyaya qarşı mübarizə haqqında” qanunlarda bu məhdudiyyət açıq şəkildə əks olunub.

Xatırladaq ki, bir neçə gün əvvəl Qubadlı şəhərində 34 milyon manatlıq yaşayış məhəlləsi tenderinin prezidentin qızı Leyla Əliyevanın keçmiş həyat yoldaşı Emin Ağalarovun şirkətinə verildiyi açıqlanmışdı.

Bakı Apellyasiya Məhkəməsi jurnalist və ictimai fəal Əhməd Məmmədli barəsində çıxarılmış 6 illik həbs hökmünü qüvvədə saxlayıb.

Mayın 14-də hakim Əli Məmmədovun sədrliyi ilə keçirilən prosesdə məhkəmə fəalın apellyasiya şikayətini təmin etməyib. Əhməd Məmmədlinin Hüquqlarını Müdafiə Komitəsinin yaydığı məlumata görə, o, əvvəlcə bəraət, alternativ olaraq isə səhhəti ilə bağlı ev dustaqlığına buraxılmasını istəyib.

Məhkəmədə çıxış edən Əhməd Məmmədli vəsatətlərinin rədd olunacağını əvvəlcədən bildiyini deyərək etirazını sərt ifadələrlə dilə gətirib: “Bu da olmazsa, xahiş edirəm mənə ölüm hökmü kəsin. Bilirəm, bizdə ölüm hökmü yoxdur, amma bu, mənim üçün daha şərəfli olar, nəinki 6 il işgəncə altında həbs cəzası çəkmək”.

Fəal bildirib ki, cinayət işində ona qarşı heç bir real sübut yoxdur. Onun sözlərinə görə, cinayət aləti hesab edilən bıçaq tapılmayıb, hadisə yerində isə qan izi aşkarlanmayıb.

Müdafiə tərəfi də istintaq materiallarındakı ziddiyyətlərə diqqət çəkib. Vəkil Elçin Sadıqov bildirib ki, hadisənin baş verdiyi iddia olunan taksidə olan digər iki sərnişin təsadüfi şəxslər deyil və bir-birlərini əvvəldən tanıyıblar.

Əhməd Məmmədli 2025-ci il mayın 6-da saxlanılıb. Ona qarşı xuliqanlıq və qəsdən sağlamlığa ağır zərər vurma maddələri ilə ittiham irəli sürülüb. İttihama əsasən, o, avtomobildə olan digər şəxsi bıçaqlayıb.

2026-cı ilin martında Bakı Ağır Cinayətlər Məhkəməsi fəalı 6 il azadlıqdan məhrum edib.

Əhməd Məmmədli isə ittihamları rədd edir və həbsinin siyasi-ictimai fəaliyyəti, eləcə də müstəqil jurnalist fəaliyyəti ilə bağlı olduğunu bildirir.

Azərbaycanın Siyasi Məhbuslarının Azadlığı Uğrunda İttifaq ölkədə siyasi məhbus hesab etdiyi şəxslərin yenilənmiş siyahısını yayıb. Mayın 13-də açıqlanan siyahıda 328 nəfərin adı yer alıb. Bu rəqəm yanvar ayında açıqlanan 340 nəfərlik siyahı ilə müqayisədə azalma göstərir.

Siyahı hüquq müdafiəçiləri Leyla Yunus və Elşən Həsənov tərəfindən Avropa Şurası Parlament Assambleyasının siyasi məhbus meyarları əsasında hazırlanıb.

Hesabat müəlliflərinin bildirdiyinə görə, son aylarda tətbiq edilən amnistiya nəticəsində 31 nəfər azadlığa buraxılıb. Onlardan 30-u dindar, biri isə vətəndaş cəmiyyəti fəalı Rza Səfərsoy olub.

Bununla yanaşı, hüquq müdafiəçiləri son aylarda dindarlara qarşı yeni həbslərin başladığını qeyd edirlər. Hüquq müdafiəçisi Arif Yunusun sözlərinə görə, fevralın sonundan mayın ortalarınadək 220-dən çox şiə dindar saxlanılıb və həbslər davam edir.

Siyahıda ən böyük qrupu 182 nəfərlə dindarlar təşkil edir. Bundan başqa, 44 müxalifət və vətəndaş cəmiyyəti üzvü, 31 jurnalist və bloger, 8 hüquq müdafiəçisi də siyasi məhbus kimi göstərilib.

Azərbaycan dünya üzrə mətbuat azadlığı reytinqində növbəti dəfə geriləyərək 180 ölkə və ərazi arasında 171-ci pillədə qərarlaşıb. Bu barədə Sərhədsiz Reportyorlar Təşkilatının (RSF) aprelin 30-da açıqladığı “Dünya Mətbuat Azadlığı İndeksi”ndə bildirilir.

Ötən il Azərbaycan bu indeksdə 164-cü yerdən 167-ci yerə geriləmişdi. Bu il isə ölkə daha da aşağı düşərək mətbuat azadlığının ən çox məhdudlaşdırıldığı dövlətlər sırasında yer alıb.

Müqayisə üçün qeyd olunur ki, Belarus 165-ci, Rusiya 172-ci, Türkmənistan isə 173-cü pillədə qərarlaşıb.

Region ölkələrinə gəldikdə, Gürcüstan 21 pillə geriləyərək 135-ci yerə düşüb. RSF bu geriləməni ölkədə davam edən demokratik böhran, etiraz aksiyalarına və onların işıqlandırılmasına təzyiqlər, eləcə də “xarici agentlər” və media maliyyələşməsi ilə bağlı məhdudlaşdırıcı qanunlarla əlaqələndirir.

Ermənistan isə 50-ci yerdə qərarlaşıb və bu ölkədə mətbuatın vəziyyəti “problemli” kimi qiymətləndirilir.

Bu ilin yanvarında Jurnalistləri Müdafiə Komitəsi (CPJ) dünyada 300-dən çox jurnalistin həbsdə olduğunu açıqlayıb. Qurumun məlumatına görə, onlardan 24-ü Azərbaycanda saxlanılır.

Qarabağ və Şərqi Zəngəzur iqtisadi rayonlarında aparılan bərpa və tikinti işləri çərçivəsində daha bir iri həcmli tenderin qalibi müəyyənləşib. Prezidentin keçmiş kürəkəni Emin Ağalarova məxsus “Sea Breeze Construction” MMC bu dəfə Qubadlı şəhərində həyata keçiriləcək tikinti layihəsi üzrə qalib elan olunub.

Cəbrayıl, Qubadlı və Zəngilan rayonlarında Bərpa, Tikinti və İdarəetmə Xidməti tərəfindən keçirilən tenderin nəticələrinə görə, şirkət Qubadlıda yerləşən yaşayış məhəlləsinin tikinti-quraşdırma işlərini icra edəcək. Dövlət satınalmalarının vahid internet portalında yerləşdirilən məlumata əsasən, müqavilənin dəyəri 34 milyon 412 min 372 manat 80 qəpik təşkil edir.

Bundan əvvəl də “Sea Breeze Construction” MMC Ağdam, Füzuli və Xocavənd rayonlarında bir sıra layihələr həyata keçirib. Bu layihələrin bir hissəsi üzrə müqavilələr tender keçirilmədən birbaşa satınalma yolu ilə bağlanıb. Ümumilikdə, şirkətin həmin rayonlarda imzaladığı müqavilələrin dəyəri 111,9 milyon manatdan çoxdur.

Müqavilələrdən birinə əsasən, şirkət Ağdam rayonunun Eyvazxanbəyli kəndində fərdi yaşayış evlərinin və mühəndis-kommunikasiya sistemlərinin tikintisini həyata keçirəcək və bunun müqabilində 61,7 milyon manat alacaq. Digər layihə isə Füzuli rayonunun Pirəhmədli kəndində yaşayış evləri, məktəb, uşaq bağçası, tibb məntəqəsi və digər sosial infrastrukturun tikintisini əhatə edir.

Beləliklə, son altı ay ərzində “Sea Breeze Construction” MMC-nin Qarabağ və Şərqi Zəngəzur bölgələrində qazandığı tikinti layihələrinin ümumi dəyəri 146,3 milyon manatı ötür. Bu fakt dövlət satınalmalarında rəqabət mühitinin səviyyəsi ilə bağlı müzakirələrə səbəb olur.

Qeyd edək ki, “Sea Breeze Construction” MMC “Sea Breeze” layihəsinin törəmə şirkətidir. “Sea Breeze” 2006-cı ildə iş adamı və müğənni Emin Ağalarov tərəfindən təsis edilib. Layihə ilkin mərhələdə Xəzər sahilində turizm obyektləri ilə fəaliyyətə başlasa da, hazırda geniş ərazini əhatə edən iri yaşayış və istirahət kompleksinə çevrilib.