Azərbaycanda internetə nəzarət sərtləşir

Azərbaycanda internet məkanına dövlət nəzarətini genişləndirən yeni qanun dəyişiklikləri qəbul edilib. Milli Məclis iyulun 10-da "İnformasiya, informasiyalaşdırma və informasiyanın mühafizəsi haqqında" Qanuna etdiyi dəyişikliklərlə internet resurslarının məhkəmə qərarı olmadan bloklanması hallarının siyahısını əhəmiyyətli dərəcədə genişləndirib.

Yeni qaydalara əsasən, dövlət qurumları artıq yalnız fövqəladə hallarda deyil, həm də təhqir, böhtan, şəxsi həyata müdaxilə, narkotik vasitələrin təbliği, pornoqrafik materialların yayılması, qumar oyunlarının təşviqi və intiharın təbliği ilə bağlı məlumatların yerləşdirildiyi iddia edilən internet resurslarına məhkəmə qərarını gözləmədən müvəqqəti giriş məhdudiyyəti tətbiq edə biləcəklər.

Dəyişikliklərə əsasən, uşaqlar üçün yaş məhdudiyyəti göstərilməyən film və oyunlar, eləcə də ictimai təhlükəsizlik üçün təhlükə yarada biləcək yalan məlumatlar da bloklama üçün əsas sayılacaq.

Azərbaycanda internet resurslarının məhkəmə qərarı olmadan bloklanması ilk dəfə 2017-ci ildə qanuna əlavə edilən 13-3-cü maddə ilə mümkün olmuşdu. Həmin dəyişiklikdən sonra bir sıra müstəqil media resurslarının fəaliyyətinə məhdudiyyət tətbiq edilmişdi.

Ekspertlər hesab edirlər ki, son dəyişikliklər dövlət orqanlarının internet məkanına müdaxilə imkanlarını daha da genişləndirir və məhkəmə nəzarətinin rolunu zəifləndirir.