Sentyabrın 16-da Bakı Ağır Cinayətlər Məhkəməsində ictimaiyyətdə “QHT işi” kimi tanınan cinayət işi üzrə təqsirləndirilən “Hüquq və İnkişaf” İctimai Birliyinin sədri Hafiz Həsənovun məhkəməsi başa çatıb.

Hakim Eldar İsmayılovun sədrliyi ilə keçirilən yekun məhkəmə iclasında Hafiz Həsənova hökm oxunub.

Məhkəmənin hökmü ilə Hafiz Həsənov Cinayət Məcəlləsinin 70-ci maddəsi tətbiq edilməklə 3 il sınaq müddəti müəyyən edilməklə şərti olaraq 8 il müddətinə azadlıqdan məhrum edilib. O, həmçinin 2 il müddətinə dövlət və yerli özünüidarəetmə orqanlarında maddi məsul vəzifə tutmaq hüququndan məhrum edilib.

Məhkəmə, eyni zamanda, Həsənov barəsində seçilmiş polis nəzarəti altına vermə qətimkan tədbirini başqa yerə getməmək haqqında iltizam qətimkan tədbiri ilə əvəz edib.

Sentyabrın 7-də Bakı Ağır Cinayətlər Məhkəməsində Seçkilərin Monitorinqi və Demokratiyanın Tədrisi Mərkəzinin (SMDT) sədri Anar Məmmədli və ictimai fəal Anar Abdulla barəsində hökm elan edilib.

Hakim Aygün Qurbanovanın sədrliyi ilə keçirilən məhkəmə prosesində Anar Məmmədli 13 il, Anar Abdulla isə 12 il müddətinə azadlıqdan məhrum edilib.

Bundan əvvəl dövlət ittihamçısı Anar Məmmədliyə 14 il, Anar Abdullaya isə 13 il həbs cəzası verilməsini tələb etmişdi.

Anar Məmmədli 2024-cü il aprelin 29-da saxlanılıb. O, Cinayət Məcəlləsinin qaçaqmalçılıqla bağlı maddəsi üzrə, qabaqcadan əlbir olan bir qrup şəxs tərəfindən cinayət törətməkdə ittiham olunur. Məmmədli ittihamları qəbul etmir və özünü təqsirli hesab etmir. Bir sıra beynəlxalq insan hüquqları təşkilatları onu siyasi məhbus kimi tanıyır.

Sentyabrın 9-da Bakı Ağır Cinayətlər Məhkəməsində “QHT işi” çərçivəsində mühakimə olunan iqtisadçı Qalib Bayramov barəsində hökm elan edilib.

Hakim Eldar İsmayılovun sədrliyi ilə keçirilən məhkəmə iclasında çıxarılan hökmə əsasən, Qalib Bayramov 2 il müddətinə müəyyən vəzifə tutmaq hüququndan məhrum edilməklə 8 il azadlıqdan məhrum etmə cəzasına məhkum edilib. Bununla belə, məhkəmə cəzanın icrasını şərti hesab edib və onun üçün 3 il sınaq müddəti müəyyənləşdirib. Bayramov barəsində tətbiq edilmiş polis nəzarəti qətimkan tədbiri isə başqa yerə getməmək haqqında iltizamla əvəz olunub.

Bundan əvvəl dövlət ittihamçısı Qalib Bayramovun 9 il müddətinə azadlıqdan məhrum edilməsini istəmişdi.

Qalib Bayramov İqtisadi Tədqiqatlar Mərkəzi İctimai Birliyinin İdarə Heyətinin sədridir. O, həmçinin iqtisadçı alim, professor Qubad İbadoğlunun qardaşıdır.

Qubad İbadoğlu 2023-cü ilin iyulunda həbs olunub. Ona qarşı əvvəlcə saxta pul hazırlama və dövriyyəyə buraxma, daha sonra isə dini ekstremist materialların hazırlanması və yayılması ilə bağlı ittihamlar irəli sürülüb. İbadoğlu bütün ittihamları siyasi motivli hesab edərək rədd edib.

2024-cü ilin aprelində Qubad İbadoğlu ev dustaqlığına buraxılıb, daha sonra isə onun barəsində polis nəzarəti qətimkan tədbiri seçilib.

"Müdafiə Xətti" insan haqları təşkilatının icraçı direktoru Rüfət Səfərov barəsində çıxarılmış 8 illik həbs hökmü qüvvədə saxlanılıb. Qərarı avqustun 24-də Bakı Apellyasiya Məhkəməsində Habil Məmmədovun sədrlik etdiyi hakimlər kollegiyası verib.

Qərardan öncə R.Səfərovun vəkilləri qismən məhkəmə istintaqının aparılması və hüquq müdafiəçisinin saxlanmasında iştirak edən polis əməkdaşlarının dindirilməsi barədə vəsatətlər qaldırıblar. Məhkəmə bu vəsatətlərin heç birini təmin etməyib. Apellyasiya prosesinin ilk iclasında irəli sürülmüş, pulun verildiyi iddia olunan qarajdakı videogörüntülərin araşdırılması barədə vəsatət də əvvəllər rədd edilmişdi.

Cinayət işinə görə, R.Səfərova Natiq İmanquliyev adlı şəxsdən torpaq satmaq bəhanəsi ilə 60 min manat aldığı, lakin nə torpağı satdığı, nə də pulu geri qaytardığı isnad olunur. İddiaya görə, 2024-cü il dekabrın 3-də N.İmanquliyev pulunun qaytarılmasını tələb etmək üçün hüquq müdafiəçisinin yaşadığı binanın qarajına gəlib, aralarında dava yaranıb və R.Səfərov ona xəsarət yetirib.

Səbail Rayon Məhkəməsi həbsdə olan iqtisadçı Fazil Qasımovun sənəd saxtalaşdırılması və müdafiə hüququnun pozulması ilə bağlı şikayətinin araşdırılmamasına görə Baş Prokurorluğun hərəkətsizliyini qanunsuz hesab edib.

30 iyul tarixli qərarla məhkəmə prokurorluğa Qasımovun vəkillərindən imtina etməsi barədə təqdim edilmiş sənədin saxtalaşdırılması və müdafiə hüququnun pozulması ilə bağlı iddiaların tam, hərtərəfli və obyektiv araşdırılmasını tapşırıb.

Qasımov bildirib ki, 2023-cü ilin sentyabrında onun adından tərtib olunmuş və vəkillərindən imtina etdiyini göstərən ərizəni imzalamayıb. Alternativ Ekspertiza Mərkəzinin rəyinə görə, həmin sənəddəki imza Qasımova məxsus deyil və başqa şəxs tərəfindən atılıb. Məhkəmə bu rəyi iş üçün mühüm yeni sübut kimi qiymətləndirib.

Azərbaycanda iki siyasi fəal cəza müddətlərini başa vurduqdan sonra azadlığa buraxılıb. Bu barədə vətəndaş cəmiyyəti nümayəndələri və siyasi fəallar sosial şəbəkələrdə məlumat yayıblar.

“İşçi Masası” Həmkarlar İttifaqları Konfederasiyasının üzvü Elvin Mustafayev üç illik həbs cəzasını başa vurduqdan sonra azadlığa çıxıb. Mustafayev 2023-cü ilin avqustunda narkotiklə bağlı ittihamlarla həbs olunmuş və üç il müddətinə azadlıqdan məhrum edilmişdi. O, ittihamları rədd edərək, üzərindən narkotik tapılması ilə bağlı iddiaları “yalan” adlandırmış və ictimai fəaliyyətinə görə cəzalandırıldığını bildirmişdi.

Azərbaycan Xalq Cəbhəsi Partiyasının (AXCP) Salyan rayon şöbəsinin sədri Əlizamin Salayev də avqustun 7-də dörd illik həbs müddətini başa vuraraq azadlığa buraxılıb. Salayev 2023-cü il fevralın 7-də həbs edilmişdi. O, Cinayət Məcəlləsinin 221.3-cü maddəsi (silah və ya silah qismində istifadə olunan əşyadan istifadə etməklə xuliqanlıq) ilə ittiham olunmuş və Qaradağ Rayon Məhkəməsinin hökmü ilə dörd il müddətinə azadlıqdan məhrum edilmişdi.

İyulun 27-də Bakı Ağır Cinayətlər Məhkəməsində ictimaiyyətdə “Toplum TV işi” kimi tanınan cinayət işi üzrə hökm elan olunub. Məhkəmə prosesinə hakim Azər Tağıyev sədrlik edib.

Məhkəmənin qərarına əsasən, təqsirləndirilən şəxslərin hər biri cəzalarını çəkdikdən sonra 2 il 6 ay müddətinə müəyyən vəzifələr tutmaq hüququndan da məhrum edilib.

Məhkəmə aşağıdakı həbs cəzalarını təyin edib:

Akif Qurbanov və Ruslan İzzətli – 15 il Ələsgər Məmmədli və Əli Zeynalov – 14 il Ramil Babayev, Müşfiq Cabbarov və İlkin Əmrahov – 13 il Fərid İsmayılov və Elmir Abbasov – 12 il

Bundan əlavə, hökm elan edildikdən sonra azadlıqda olan Elmir Abbasov məhkəmə zalında həbs olunub.

Təqsirləndirilən şəxslər əvvəlcə qaçaqmalçılıq ittihamı ilə həbs olunsalar da, sonradan onlara qarşı daha ağır cəzalar nəzərdə tutan əlavə ittihamlar irəli sürülüb.

İyulun 24-də Bakı Ağır Cinayətlər Məhkəməsində Seçkilərin Monitorinqi və Demokratiyanın Tədrisi Mərkəzinin (SMDT) sədri Anar Məmmədli və ictimai fəal Anar Abdullanın cinayət işi üzrə növbəti məhkəmə iclası keçirilib. Hakim Aygün Qurbanovanın sədrliyi ilə keçirilən prosesdə dövlət ittihamçısı Vüsal Mehrəliyev Anar Məmmədliyə 14 il, Anar Abdullaya isə 13 il azadlıqdan məhrumetmə cəzası verilməsini istəyib.

Məhkəmənin növbəti iclası avqustun 6-na təyin edilib. Həmin iclasda müdafiə tərəfinin çıxışlarının dinlənilməsi gözlənilir.

Anar Məmmədli 2024-cü il aprelin 29-da saxlanılıb və qaçaqmalçılıq da daxil olmaqla bir sıra maddələrlə ittiham olunur. O, ittihamları siyasi motivli hesab edir və özünü təqsirli bilmir. Anar Abdulla isə əvvəlcə inzibati qaydada 30 sutka həbs edilib, daha sonra istintaqın sonunda ona da eyni ittihamlar irəli sürülüb. O da irəli sürülən ittihamları rədd edir.

Həbsdə olan Azərbaycan Xalq Cəbhəsi Partiyasının (AXCP) sədri Əli Kərimlinin Hüquqlarını Müdafiə Komitəsi onun saxlanma şəraitinin ağırlaşdırıldığı barədə bəyanat yayıb.

Komitənin məlumatına görə, səkkiz aydır Dövlət Təhlükəsizliyi Xidmətinin (DTX) istintaq təcridxanasında saxlanılan Əli Kərimliyə qarşı fiziki və psixoloji təzyiqlər davam edir, son günlər isə əlavə məhdudiyyətlər tətbiq olunub.

Bəyanatda bildirilir ki, Kərimlinin yerləşdirildiyi kamerada psixi problemləri olduğu iddia edilən və terrorçuluq ittihamı ilə həbsdə olan başqa bir məhbus saxlanılır. Komitənin iddiasına görə, həmin şəxs gecələr səs-küy salaraq Kərimlinin normal istirahət etməsinə mane olur.

Komitə həmçinin qeyd edir ki, Əli Kərimlinin ailə üzvləri ilə görüşmək, telefon danışığı aparmaq, açıq havada gəzmək və gündəlik xəbərlərlə tanış olmaq imkanlarına tətbiq olunan əvvəlki məhdudiyyətlər də qüvvədə qalır.

Bəyanata əsasən, son günlər əlavə məhdudiyyətlər də tətbiq edilib. İddia olunur ki, Kərimliyə ailəsindən göndərilən qida sovqatını qəbul etməyə məhdudiyyət qoyulub, kamerasındakı televiziya yayımı dayandırılıb, məhkəmə üçün hazırladığı vəsatətlər də daxil olmaqla əlyazma qeydləri müsadirə edilib. Bundan başqa, vəkillərinin görüş zamanı ona yazılı qeydlər təqdim etməsinə də icazə verilmədiyi bildirilir.

İyulun 9-da Bakı Ağır Cinayətlər Məhkəməsində "QHT işi" üzrə təqsirləndirilən vətəndaş cəmiyyəti fəalı Nərgiz Muxtarovanın cinayət işi üzrə yekun məhkəmə iclası keçirilib.

Məhkəmə baxışı zamanı dövlət ittihamçısı Nərgiz Muxtarovanın 8 il müddətinə azadlıqdan məhrum edilməsini, cəzanın isə 4 il sınaq müddəti müəyyən edilməklə şərti tətbiq olunmasını istəyib.

Hakim Leyla Əsgərova-Məmmədovanın sədrliyi ilə keçirilən prosesdə hökm elan edilib. Məhkəmənin qərarı ilə Nərgiz Muxtarova 3 il sınaq müddəti təyin edilməklə 7 il 6 ay müddətinə şərti azadlıqdan məhrum etmə cəzasına məhkum edilib.