Xocalıda məskunlaşmış sakin evinin keyfiyyəti ilə bağlı narazılığını bildirir. O problemləri videoya çəkərək aidiyyəti qurumlara müraciət edir.

Böyük Qayıdış proqramı çərçivəsində Xocalı rayonunun Xanabad kəndində məskunlaşan sakin ona verilmiş mənzilin vəziyyətindən narazılığını sosial şəbəkələrdə yayımladığı video ilə ictimailəşdirib. Vaxtilə Bakıda 280 nömrəli məktəbin həyətində yerləşən inzibati binada məskunlaşmış sakin bildirir ki, köçürüldüyü 1897354 nömrəli mənzildə çoxsaylı tikinti və kommunal problemləri mövcuddur.

Videoda sakin iddia edir ki, evin hasarlarında dağılmalar var, yağış suları həyətə və yaşayış sahəsinə dolur, nəticədə otaqlarda güclü nəmişlik yaranır. Onun sözlərinə görə, döşəməyə vurulan parketlər hərəkət edir, bu isə mənzilin tikinti keyfiyyəti ilə bağlı ciddi suallar yaradır. Sakin həmçinin bildirir ki, sanitar qovşaqda yerləşən alçıpandan hazırlanmış qapılar qırılıb, kanalizasiya sistemindəki traplar işlək vəziyyətdə deyil, su kranlarının bir hissəsi sınıb, santexnika sistemi isə istifadəyə yararsız vəziyyətdədir. Video müraciətdə o, belə şəraitdə böyüyən uşaqların sağlamlığı ilə bağlı narahatlığını ifadə edir və aidiyyəti dövlət qurumlarının nümayəndələrini mənzilə baxış keçirməyə dəvət edir. Sakin iddia edir ki, etdiyi müraciətlərə baxmayaraq, şikayətləri qeydə alınmır və qaldırdığı problemlər aradan qaldırılmır. Hazırda videoda səsləndirilən iddialarla bağlı aidiyyəti dövlət qurumlarının mövqeyi məlum deyil.