Xocavənd rayonunda dövlət proqramı çərçivəsində tikilən yaşayış evlərinin keyfiyyəti ilə bağlı narazılıqlar davam edir. Sosial şəbəkələrdə yayılan videogörüntülərdə sakinlər tikinti qüsurlarından, tikinti işlərində çalışan fəhlələr isə əməkhaqlarının uzun müddətdir ödənilmədiyindən şikayət edirlər.

Xocavənd rayon sakini Hüseynov Ramil Telman oğlu yayımladığı videoda ona verilmiş evdə ciddi tikinti qüsurlarının olduğunu bildirir. Onun sözlərinə görə, həyətin hasarında iri çatlar yaranıb və hasarın uçmaq təhlükəsi var.

"Hasar çatlayıb, yağış hasarın dibini yuyub. Divar palçıqla hörülüb. Kimsə altında qalıb ölməlidir? Kombi də işləmir", – deyə sakin bildirir.

O, evin keyfiyyətsiz tikildiyini və müraciətlərinə baxmayaraq problemlərin aradan qaldırılmadığını iddia edir.

Məmməd Alpay, Seçki Monitorinqi Alyansının sədri və siyasi məhbus kimi tanınan insan hüquqları müdafiəçisi, saxlanma şəraiti və hüquqlarına qoyulan məhdudiyyətlərlə bağlı narahatlıqlarını əks etdirən bəyanat yayıb.

Alpayın sözlərinə görə, son altı ay ərzində yaxın ailə üzvləri ilə üzbəüz görüşlər faktiki olaraq dayandırılıb. Bu müddət ərzində yalnız şüşə arakəsmə vasitəsilə görüşlərə icazə verilib. O bildirir ki, saxlanma müəssisəsinin rəhbərliyi dəfələrlə üzbəüz görüşlərin bərpa ediləcəyinə söz versə də, bu vədlər yerinə yetirilməyib. Eyni zamanda, onun iddiasına görə, şüşə arakəsmə vasitəsilə görüşlərə də geniş ailə üzvləri və dostlar üçün icazə verilmir.

Alpay həmçinin bildirir ki, yaxınları tərəfindən ona göndərilən jurnal, qəzet və bəzi hallarda kitablar özünə çatdırılmayıb.

O əlavə edir ki, məhbuslar məhkəmə iclaslarına həddindən artıq sıx şəraitdə xüsusi penitensiar nəqliyyat vasitələri ilə aparılır. Onun sözlərinə görə, bu avtomobillərə nəzərdə tutulduğundan daha çox saxlanılan şəxs yerləşdirilir ki, bu da daşınma zamanı ciddi narahatlıq yaradır.

Digər bir narahatlıq isə məhkəmə iclaslarından sonra saxlanılan şəxslərlə rəftarla bağlıdır. Alpay bildirir ki, onlar dərhal saxlanma müəssisəsinə qaytarılmaq əvəzinə, çox vaxt bir neçə saat, bəzi hallarda isə günün sonuna qədər məhkəmə binalarında gözləməyə məcbur edilirlər.

Böyük Qayıdış proqramı çərçivəsində Xocalı rayonunun Xanabad kəndində məskunlaşan sakin ona verilmiş mənzilin vəziyyətindən narazılığını sosial şəbəkələrdə yayımladığı video ilə ictimailəşdirib. Vaxtilə Bakıda 280 nömrəli məktəbin həyətində yerləşən inzibati binada məskunlaşmış sakin bildirir ki, köçürüldüyü 1897354 nömrəli mənzildə çoxsaylı tikinti və kommunal problemləri mövcuddur.

Sənəddə qeyd edilir ki, 2026-cı ilin may ayına olan məlumata görə, ölkədə siyasi məhbusların sayı 328 nəfərə çatıb. Həmçinin Avropa İnsan Hüquqları Məhkəməsinin (AİHM) Azərbaycanla bağlı çoxsaylı qərarlarının hələ də icra edilməməsi diqqətə çatdırılır.

AŞPA hesab edir ki, son illərdə qəbul edilən məhdudlaşdırıcı qanunvericilik aktları müstəqil jurnalistikanın, siyasi müxalifətin, vətəndaş cəmiyyəti institutlarının və ifadə azadlığının fəaliyyət imkanlarını əhəmiyyətli dərəcədə məhdudlaşdırıb.

Qətnamədə Azərbaycan hakimiyyətinə bir sıra çağırışlar da yer alıb. Assambleya jurnalist fəaliyyətinə, korrupsiya araşdırmalarına, demokratik baxışlarına və ya insan hüquqlarının müdafiəsinə görə təqib olunan şəxslərə qarşı təzyiqlərin dayandırılmasını və həbs edilənlərin dərhal azadlığa buraxılmasını tələb edir. Eyni zamanda, AŞPA-nın 1900 saylı qətnaməsində müəyyən edilmiş meyarlara əsasən siyasi məhbus hesab edilən şəxslərin azad edilməsi istənilir.

2025-ci ildə işğaldan azad olunmuş ərazilərin yenidən qurulması və bərpasına 4 milyard 454,9 milyon manat vəsait xərclənib. Bu, əvvəlki illə müqayisədə təxminən 900 milyon manat azdır. 2024-cü ildə həmin məqsədlə 5,4 milyard manat istifadə olunmuşdu.

Bu barədə Hesablama Palatasının 2025-ci il dövlət büdcəsinin icrasına dair rəyində bildirilir.

Hesabata görə, ötən il ayrılan vəsaitin 3,9 milyard manatı infrastruktur layihələrinin tikintisi və yenidən qurulmasına yönəldilib. Maliyyələşmə əsasən dövlət büdcəsinin “İşğaldan azad olunmuş ərazilərin yenidən qurulması və bərpası” bölməsi, Ehtiyat Fondu və dövlət əsaslı vəsait qoyuluşu hesabına həyata keçirilib.

Palata qeyd edir ki, yenidənqurma layihələri üzrə debitor borclar artmaqda davam edir. Belə ki, 9 sifarişçi qurum üzrə yığılan debitor borcun həcmi 517,4 milyon manata çatıb. Bu göstərici 2025-ci ilin əvvəli ilə müqayisədə 35 faiz və ya 150,3 milyon manat çoxdur.

İyunun 17-də Gəncə Ağır Cinayətlər Məhkəməsində “QHT işi” üzrə təqsirləndirilən ictimai fəal Asəf Əhmədov barəsində hökm elan olunub.

Məhkəmənin qərarı ilə Gəncə Regional İcma Mərkəzinin rəhbəri Asəf Əhmədov 8 il müddətinə azadlıqdan məhrum edilib.

Asəf Əhmədov 2025-ci ilin aprel ayında yenilənmiş “QHT işi” çərçivəsində həbs edilib. O, irəli sürülən ittihamları qəbul etmir və təqibinin ictimai fəaliyyəti ilə bağlı olduğunu bildirir.

“QHT işi” üzrə həbslər 2025-ci ilin mart ayından başlayıb. Həmin vaxt Vətəndaş Hüquqları İnstitutunun rəhbəri Bəşir Süleymanlı və Seçki Müşahidə Alyansının icraçı direktoru Məmməd Alpay (Məmmədzadə) barəsində həbs qətimkan tədbiri seçilib.

İyunun 12-də Bakı Ağır Cinayətlər Məhkəməsində “Müdafiə Xətti” insan haqları müdafiə təşkilatının icraçı direktoru Rüfət Səfərov barəsində hökm elan olunub.

Hakim Aygün Qurbanovanın sədrliyi ilə keçirilən məhkəmə prosesində Rüfət Səfərov 8 il müddətinə azadlıqdan məhrum edilib.

Bundan əvvəl dövlət ittihamçısı məhkəmədən Səfərovun 9 il müddətinə azadlıqdan məhrum edilməsini istəmişdi.

Rüfət Səfərov 2024-cü il dekabrın 3-də həbs olunub. Ona Azərbaycan Respublikası Cinayət Məcəlləsinin 127.2.3-cü (qəsdən sağlamlığa az ağır zərər vurma), 178.3.2-ci (külli miqdarda ziyan vurmaqla dələduzluq) və 221.1-ci (xuliqanlıq) maddələri ilə ittiham irəli sürülüb. Həmin maddələr üzrə 10 ilədək azadlıqdan məhrumetmə cəzası nəzərdə tutulur.

“AzelTV” internet kanalının təsisçisi və jurnalist Əfqan Sadıqov barəsində həbs qətimkan tədbiri seçilib. O, 9 iyun 2026-cı ildə hədə-qorxu ilə tələb etmə ittihamı ilə saxlanılaraq məhkəmə qərarı əsasında həbs edilib.

Vəkilinin mətbuata verdiyi məlumata görə, 2024-cü ildə Əfqan Sadıqovla bağlı Baş Prokurorluqda başlanmış və sonradan xitam verilmiş cinayət işi yenidən icraata qaytarılıb. Ona Azərbaycan Respublikası Cinayət Məcəlləsinin 182.2.1-ci (qabaqcadan əlbir olan bir qrup şəxs tərəfindən törədildikdə), 182.2.2-ci (təkrar törədildikdə) və 182.2.4-cü (xeyli miqdarda əmlak əldə etmək məqsədilə törədildikdə) maddələri ilə ittiham irəli sürülüb.

Vəkilin sözlərinə görə, cinayət işi üzrə zərərçəkmiş qismində tanınan şəxslər Baş Prokurorluğun işə xitam verilməsi barədə qərarından Binəqədi Rayon Məhkəməsinə şikayət ediblər. Məhkəmə 9 iyun tarixində həmin şikayətə baxaraq Baş Prokurorluğun xitam qərarını ləğv edib və işin yenidən istintaqa qaytarılması barədə qərar verib. Elə həmin gün Binəqədi Rayon Məhkəməsi Əfqan Sadıqov barəsində 30 iyul 2026-cı il tarixinədək həbs qətimkan tədbiri seçib.

İyunun 8-də Bakı Ağır Cinayətlər Məhkəməsində “Toplum TV” ilə əlaqəli jurnalistlər və vətəndaş cəmiyyəti nümayəndələrinə qarşı açılmış cinayət işi üzrə məhkəmə istintaqı yekunlaşıb.

Hakim Azər Tağıyevin sədrliyi ilə keçirilən məhkəmə iclasında dövlət ittihamçısı təqsirləndirilən şəxslər üçün 13 ildən 16 ilədək azadlıqdan məhrumetmə cəzası tələb edib.

Prokuror III Respublika Platformasının spikeri Akif Qurbanovun və təşkilatın qurucu heyət üzvü Ruslan İzzətlinin 16 il müddətinə azadlıqdan məhrum edilməsini istəyib. “Toplum TV”nin həmtəsisçisi Ələsgər Məmmədli və Demokratik Təşəbbüslər İnstitutunun əməkdaşı Əli Zeynalov üçün isə 15 il həbs cəzası tələb olunub.

Dövlət ittihamçısı həmçinin Ramil Babayev, İlkin Əmrahov və Müşfiq Cabbarovun 14 il, jurnalistlər Fərid İsmayılov və Elmir Abbasovun isə 13 il müddətinə azadlıqdan məhrum edilməsini istəyib.

Bundan əlavə, prokuror təqsirləndirilən şəxslərin üç ilədək müəyyən vəzifələr tutmaq hüququndan məhrum edilməsini, eləcə də üzərinə həbs qoyulmuş ev və avtomobillərinin müsadirə olunmasını tələb edib.

Qubad İbadoğlunun oğlu Emin Bayramlı Facebook hesabında paylaşdığı məlumatda bildirib ki, uzun fasilədən və üç illik həbsdən sonra 30 may 2026-cı ildə ilk dəfə olaraq atası ürəyindəki aorta genişlənməsinin ölçüsünün dəqiqləşdirilməsi, ürək qapaqları və damarlarının vəziyyətinin qiymətləndirilməsi məqsədilə kontrastlı kompüter tomoqrafiyası (KT) müayinəsindən keçməli idi. Bu müayinə üçün növbə ona 16 may 2026-cı il tarixində verilmiş və vaxtı nəhayət 30 maya təyin edilmişdi.

Lakin səhər saat 7-dən sonra Bakı şəhərində yerləşən Yeni Klinikaya gələn Qubad İbadoğluna təxminən bir saat gözlədikdən sonra bildirilib ki, kontrast maddə (boya) tükəndiyi üçün müayinəni həyata keçirmək mümkün deyil.

Bu izah ciddi suallar doğurur. Cənubi Qafqazın ən böyük xəstəxanasında əvvəlcədən planlaşdırılmış müayinələrin aparılması üçün zəruri olan kontrast maddənin olmaması necə mümkün ola bilər? Əgər belə bir problem mövcud idisə, niyə bu barədə əvvəlcədən məlumat verilməyib?