Avropa Şurası Parlament Assambleyasının (AŞPA) siyasi məhbuslar üzrə baş məruzəçisi Azadə Röjhan (İsveç, SOC) azərbaycanlı hüquq müdafiəçisi Anar Məmmədlinin dərhal azad edilməsinə çağırıb.

Məmmədlinin həbsinin ikinci ildönümü ilə bağlı yaydığı bəyanatda Röjhan onu tanınmış seçki müşahidəçisi və vətəndaş cəmiyyəti fəalı, həmçinin 2014-cü il Vatslav Havel İnsan Hüquqları Mükafatı laureatı kimi xarakterizə edib. O qeyd edib ki, hazırda Məmmədliyə qarşı irəli sürülən çoxsaylı ittihamlar geniş şəkildə onun vətəndaş fəallığına, müstəqil seçki monitorinqinə və beynəlxalq təşkilatlarla əməkdaşlığına cavab olaraq qiymətləndirilir.

Məmmədli sonuncu dəfə 29 aprel 2024-cü ildə saxlanılıb və bu, onun hüquq müdafiə fəaliyyəti ilə əlaqədar ikinci həbsi olub. O, daha əvvəl 2013-cü il prezident seçkilərindən sonra seçki monitorinqi fəaliyyəti səbəbilə həbs edilmişdi.

Bakı Apellyasiya Məhkəməsində Siyasi Menecment İnstitutunun rəhbəri Azər Qasımlının şikayəti üzrə məhkəmə iclası keçirilib.

Azər Qasımlının həyat yoldaşı Samirə Qasımlının Meydan TV-yə verdiyi məlumata görə, prosesdə zərərçəkmiş kimi tanınan Qurbanəli Yusibov və onun vəkili iştirak etməyib. Qasımlının vəkili Rövşanə Rəhimli buna etiraz edərək bildirib ki, zərərçəkmişə ünvanlanacaq sualları var. Dövlət ittihamçısı isə etiraz edərək qeyd edib ki, həmin suallara artıq birinci instansiya məhkəməsində cavab verilib.

Müdafiə tərəfi vəsatət qaldıraraq əlavə istintaqın aparılmasını və Qurbanəli Yusibovun keçmiş həyat yoldaşı Fərəhbanu Niftəliyevanın şahid qismində dindirilməsini tələb edib. Vəkil Rövşanə Rəhimli çıxışında bildirib ki, Niftəliyevanın dindirilməsi barədə məhkəmə qərarı olsa da, bu qərar icra olunmayıb. Onun sözlərinə görə, həmin şahidin ifadəsi Azər Qasımlıya qarşı irəli sürülən ittihamların əsassız olduğunu üzə çıxara bilər.

Aprelin 27-də Bakı Ağır Cinayətlər Məhkəməsində “Toplum TV işi” üzrə növbəti məhkəmə iclası keçirilib. Hakim Azər Tağıyevin sədrliyi ilə baş tutan proses şahidlərin dindirilməsi ilə davam edib.

İclas zamanı təqsirləndirilən şəxslər bir sıra vəsatətlərlə çıxış ediblər. “Toplum TV”nin həmtəsisçisi, media eksperti Ələsgər Məmmədli növbəti dəfə ev dustaqlığına buraxılması barədə müraciət edib. O, səhhətində yaranmış problemləri vurğulayaraq bildirib ki, boğazındakı şişlərin müayinəsi və müalicəsi üçün endokrinoloq müayinəsinə və hormonal analizlərə ehtiyac var. Onun sözlərinə görə, Bakı İstintaq Təcridxanasında bu imkanlar mövcud deyil.

“QHT işi” üzrə təqsirləndirilən şəxslərdən biri, ABŞ Alman Marşal Fondunun Azərbaycan üzrə keçmiş məsləhətçisi Mehriban Rəhimli aprelin 27-də Bakı Ağır Cinayətlər Məhkəməsində ifadə verib.

O, ötən ilin əvvəlindən Baş Prokurorluğun İstintaq İdarəsində yerli və beynəlxalq təşkilatlarla bağlı aparılan cinayət işi çərçivəsində məsuliyyətə cəlb olunan təxminən 15 vətəndaş cəmiyyəti nümayəndəsindən biridir.

Mehriban Rəhimliyə qarşı Cinayət Məcəlləsinin 193-1.3.2-ci (cinayət yolu ilə əldə edilmiş əmlakın leqallaşdırılması – xeyli miqdarda), 308-ci (vəzifə səlahiyyətlərindən sui-istifadə) və 313-cü (vəzifə saxtakarlığı) maddələri ilə ittiham irəli sürülüb.

Şuşa Şəhəri Dövlət Qoruğu İdarəsinin keçirdiyi tender müsabiqəsinin qalibi “DİLER İNŞAAT” QSC olub. Müqaviləyə əsasən, şirkət Şuşa şəhərinin D-3 massivində yerləşən ərazidə ikinci mərhələ çərçivəsində nəzərdə tutulan 7 yaşayış binasının tikintisi və ərazinin abadlaşdırılması işlərini həyata keçirəcək. Bunun üçün şirkətə 29 milyon 373 min 906 manat 67 qəpik ödəniləcək. “DİLER İNŞAAT” QSC 28 oktyabr 2016-cı ildə dövlət qeydiyyatına alınıb. Şirkətin hüquqi ünvanı Bakı şəhəri, Yasamal rayonu, Moskva prospekti 73A ünvanında yerləşir. Nizamnamə kapitalı 2010 manat olan şirkətin qanuni təmsilçisi Süleymanov Elxan Füzuli oğludur.

Hesablama Palatasının audit hesabatında bildirilir ki, “Azərenerji” ASC-yə ayrılan dövlət investisiyalarının yoxlanılması zamanı azad olunmuş ərazilərdə tikilən Kiçik Su Elektrik Stansiyaları (KSES) üzrə bir sıra ciddi nöqsanlar müəyyən edilib. Hesabata əsasən, layihələr üzrə texniki-iqtisadi əsaslandırmalar aparılmadan 2022–2024-cü illər ərzində 7 KSES-in tikintisi üçün dövlət investisiyası ayrılıb. Audit ümumilikdə 255,8 milyon manatdan artıq vəsaiti əhatə edib. Yoxlama zamanı məlum olub ki, stansiyalar istifadəyə verildikdən sonra onların istehsal gücünün cəmi 14,7 faizdən 46 faizə qədər hissəsindən istifadə olunub.

Hesablama Palatasının Kənd Təsərrüfatı Nazirliyi, Aqrar Kredit və İnkişaf Agentliyi (AKİA) və Aqrar Subsidiya Şurasında apardığı audit nəticəsində bir sıra ciddi pozuntu və uyğunsuzluqlar müəyyən olunub.

Bu barədə məlumat Palatanın “Dövlət auditi” adlı rəsmi bülletenində dərc edilib. Yoxlamalar 2022–2025-ci illəri əhatə edib.

Hesabatda peyk görüntülərinə istinadən bildirilir ki, 117 min 454 hektar torpaq sahəsində becərmə, bəzi hallarda isə hətta şum işlərinin aparılması təsdiqini tapmayıb. Buna baxmayaraq, 19 fermerə ümumilikdə 24,2 milyon manat əkin subsidiyası ödənilib.

Audit nəticələrinə görə, subsidiya ödənilmiş əkin sahələri ilə faktiki biçin aparılmış sahələr arasında da ciddi fərqlər aşkarlanıb.

Belə ki, 2023–2024-cü illərdə biçilməyən 44 min 502 hektar sahəyə görə 10 milyon 235,4 min manat subsidiya ödənildiyi qeyd olunub.

Hələlik audit hesabatında adı keçən dövlət qurumlarından məsələ ilə bağlı münasibət almaq mümkün olmayıb.

Qarabağ bölgəsinə köçürülən sakinlərdən biri ona təqdim edilən yaşayış evinin keyfiyyətindən narazı olduğunu bildirib.

Bir aydır ki, Cəbrayıl rayonunun Horovlu kəndində məskunlaşmış keçmiş məcburi köçkün iddia edir ki, ona verilən ev keyfiyyətsiz tikilib. Sakin tərəfindən təqdim olunan videodan görünür ki, evin bünövrəsi sementdən istifadə olunmadan inşa edilib. Onun sözlərinə görə, divardan qopan kafelin arxasında sement əvəzinə qum istifadə edildiyi görünür.

Ev sahibi həmçinin bildirir ki, evin damı su keçirir və yağış yağan zaman su həm zala, həm də yataq otağına dolur. Onun sözlərinə görə, məsələ ilə bağlı müxtəlif qurumlara müraciət etsə də, ona “səbirli olmağı” tövsiyə ediblər.

Beynəlxalq hüquq təşkilatı “Clooney Foundation for Justice” müxalif siyasətçi Tofiq Yaqublu barədə məhkəmə prosesinin monitorinqinə dair hesabat yayıb. Təşkilatın hazırladığı sənəddə onun məhkəmə araşdırması zamanı ciddi hüquq pozuntularının baş verdiyi qeyd olunur.

Hesabata görə, 15 ay davam edən istintaq və məhkəmə prosesi ərzində Yaqublunun bir sıra fundamental hüquqları pozulub. Monitorinq nəticələrinə əsasən, Tofiq Yaqublu bütün məhkəmə iclasları boyunca şüşə kabinədə saxlanılıb. Təşkilat bildirir ki, bu şərait həm onun insan ləyaqətini alçaldıb, həm də vəkilləri ilə məxfi məsləhətləşmələr aparmasını faktiki olaraq mümkünsüz edib.

Hesabatda həmçinin qeyd olunur ki, Yaqublunun vəkillərinə ötürmək istədiyi qeydlər həbsxana mühafizəçiləri tərəfindən müsadirə olunub və oxunub. Məhkəmə isə müdafiə tərəfinin bu məsələ ilə bağlı şikayətlərini “təhlükəsizlik protokolu” ilə əsaslandıraraq rədd edib.

Azərbaycan Ali Məhkəməsi “Abzas Media işi” üzrə həbs edilən jurnalistlərin kassasiya şikayətlərini təmin etməyib.

Hakim Zaur Hüseynovun sədrliyi ilə keçirilən son məhkəmə iclasında iş üzrə təqsirləndirilən digər şəxslərin – jurnalistlər Hafiz Babalı, Sevinc Vaqifqızı, Nərgiz Absalamova və Elnarə Qasımovanın kassasiya şikayətlərinə də baxılıb.

“Abzas Media”nın qadın jurnalistləri prosesdə iştirak etmədiklərinə görə onları məhkəmədə vəkilləri təmsil edib.

2023-cü ilin noyabr ayından etibarən “Abzas Media”nın direktoru Ülvi Həsənli, baş redaktor Sevinc Vaqifqızı, layihə koordinatoru Məhəmməd Kekalov, araşdırmaçı jurnalist Hafiz Babalı, jurnalistlər Elnarə Qasımova və Nərgiz Absalamova, həmçinin “Azadlıq Radiosu”nun əməkdaşı və iqtisadçı Fərid Mehralızadə həbs edilib.