Birləşmiş Millətlər Təşkilatının (BMT) üç xüsusi məruzəçisi hazırda həbsdə olan jurnalist Ülviyyə Əli (Quliyeva) ilə bağlı Azərbaycan hökumətinə rəsmi müraciət ünvanlayıb.

Yanvarın 16-da göndərilən müraciətdə xüsusi məruzəçilər Rim Əlsalem, İrine Xan və Marqarit Satertveyt jurnalistin həbsi və saxlanılması zamanı iddia olunan zorakılıq halları ilə bağlı hökumətdən izahat tələb etdiklərini bildiriblər.

Məruzəçilərin məlumatına görə, Ülviyyə Əli mayın 6-dan 7-nə keçən gecə müxalif siyasətçinin məhkəmə prosesini işıqlandırdıqdan sonra yaşadığı mənzildə polis əməkdaşları tərəfindən saxlanılıb. Bildirilir ki, saxlanılma zamanı ona fiziki təzyiq göstərilib, vəkillə təmin olunmayıb, evdə aparılan axtarış isə ciddi prosedur pozuntuları ilə həyata keçirilib. Daha sonra mənzildə jurnalistə məxsus olmadığı iddia edilən nağd pulun “tapıldığı” bildirilib.

Qarabağ bölgəsinə qayıdan sakinlərə təqdim olunan mənzillərin keyfiyyəti ilə bağlı narahatlıqlar artır. Bildirilir ki, bəzi evlər keyfiyyətsiz və yarımçıq şəkildə tikilib.

Laçın şəhəri, Heydər Əliyev prospekti 157 ünvanında yaşayan Fariz adlı sakin ona verilmiş evin vəziyyəti ilə bağlı narazılığını ictimai şəkildə ifadə edib. Onun paylaşdığı video görüntülərdə iddia olunur ki, tikintidə keyfiyyətsiz materiallardan istifadə olunub, işlər etinasız aparılıb və tikinti normalarına riayət edilməyib. O, həmçinin smetada nəzərdə tutulan bəzi avadanlıqların mövcud olmadığını bildirir.

Farizin sözlərinə görə, ev yeni istifadəyə verilməsinə baxmayaraq, artıq fasadda çatlar əmələ gəlib. O, həmçinin bünövrənin düzgün qoyulmadığını iddia edir və bu vəziyyətin tikilinin dayanıqlılığı ilə bağlı narahatlıq doğurduğunu qeyd edir.

Martın 11-də Bakı Ağır Cinayətlər Məhkəməsində Siyasi Menecment İnstitutunun rəhbəri Azər Qasımlı barədə hökm elan olunub. Hakim Elmin Rüstəmovun sədrliyi ilə keçirilən prosesdə Qasımlı 12 il müddətinə azadlıqdan məhrum edilib.

Bundan əvvəl dövlət ittihamçısı onun üçün 13 il həbs cəzası istəmişdi.

Sərhədsiz Reportyorlar Təşkilatı (RSF) Azərbaycanda həbsdə olan jurnalistlərin, o cümlədən AzadlıqRadiosunun əməkdaşı və iqtisadçı Fərid Mehralızadənin azadlığa buraxılmasını tələb edib.

Təşkilatın yaydığı bəyanata görə, Mehralızadə martın 6-da “Abzas Media işi” üzrə barəsində çıxarılmış 9 illik həbs hökmündən kassasiya şikayəti verəcək. RSF onun və ölkədə həbsdə saxlanılan digər jurnalistlərin dərhal azad edilməsinə çağırıb.

Azərbaycanda yerli və beynəlxalq qeyri-hökumət təşkilatları ilə bağlı cinayət işi üzrə həbsdə olan sosial işçi Zamin Zəki üçün prokuror 8 il həbs cəzası istəyib. Bu barədə martın 4-də Bakı Ağır Cinayətlər Məhkəməsində hakim Elmin Rüstəmovun sədrliyi ilə keçirilən iclasda bildirilib.

Prokuror Zəkiyə qarşı Cinayət Məcəlləsinin 193-1-ci (cinayət yolu ilə əldə edilmiş əmlakın leqallaşdırılması), 308-ci (vəzifə səlahiyyətlərindən sui-istifadə) və 313-cü (vəzifə saxtakarlığı) maddələri üzrə ittihamların məhkəmədə sübuta yetirildiyini deyib.

Sosial şəbəkələrdəki paylaşımlarına görə altı nəfər inzibati məsuliyyətə cəlb edilib. Onlardan dördünə inzibati həbs, iki nəfərə isə inzibati cərimə verilib.

Bu barədə Baş Prokurorluq məlumat yayıb. Qurumun bildirdiyinə görə, həmin şəxslər İnzibati Xətalar Məcəlləsinin 510.2-ci maddəsini pozaraq sosial şəbəkələrdə ictimai mənəviyyatı təhqir edən, açıq hörmətsizlik göstərən və əxlaqa zidd paylaşımlar ediblər.

“İşçi Masası” Həmkarlar İttifaqları Konfederasiyasının idarə heyətinin üzvü, əmək hüquqları fəalı Sara Rəhimova barəsində cinayət işi açıldığını, axtarışa verildiyini və ölkədən çıxışına qadağa qoyulduğunu bildirir.

Rəhimovanın sözlərinə görə, o, fevralın 21-də xarici pasportunu almaq üçün ASAN Xidmət Mərkəzi №3-ə müraciət edərkən barəsində cinayət işinin açıldığı ona bildirilib. Daha sonra o, Polis Bölməsi №22-yə aparılıb, ardınca isə Səbail Rayon Polis İdarəsinin əməkdaşları tərəfindən idarəyə gətirilib.

Polis idarəsində ona 2024-cü ildə barəsində cinayət işinin başladıldığı, axtarışa verildiyi və ölkədən çıxışına qadağa qoyulduğu deyilib. O, hansı maddə ilə ittiham olunduğunun açıqlanmadığını bildirir.

Dövlət Təhlükəsizliyi Xidmətinin (DTX) rəisi Əli Nağıyevin ailəsi ilə əlaqəli olduğu bildirilən özəl mühafizə şirkəti 2026-cı ilin əvvəlindən etibarən 16 milyon manatdan çox dəyərində dövlət tenderlərinin qalibi olub.

Dövlət satınalmalarının vahid internet portalında yerləşdirilən məlumatlara görə, “GESCO” ASC Elm və Təhsil Nazirliyi, Əmlak Məsələləri Dövlət Xidməti və digər dövlət qurumlarının keçirdiyi bir neçə tenderdə qalib seçilib. Müqavilələr şəhər və rayonlarda mühafizə xidmətlərinin təşkili ilə bağlıdır və ümumi məbləği 16 milyon 372 min 687 manat təşkil edir.

Transparency International təşkilatı Korrupsiyanın Qavranılması İndeksi üzrə 2026-cı il hesabatını açıqlayıb. Hesabata görə, Azərbaycan Cənubi Qafqaz ölkələri arasında ən aşağı mövqedə qərarlaşıb.

Reytinqdə Gürcüstan 56-cı, Ermənistan 65-ci, Azərbaycan isə 130-cu yerdə göstərilib. Bununla da Azərbaycan region üzrə ən zəif nəticə göstərən ölkə olub.

Bakı Ağır Cinayətlər Məhkəməsində hakim Vüqar Seyidovun sədrliyi ilə Vətəndaş Hüquqları İnstitutunun rəhbəri, hüquq müdafiəçisi Bəşir Süleymanlının növbəti məhkəmə prosesi keçirilib. Süleymanlı çıxışında ona qarşı irəli sürülən ittihamları qəbul etmədiyini və fəaliyyətinin qanuni çərçivədə həyata keçirildiyini bildirib.

O qeyd edib ki, ABŞ-ın Alman Marşal Fondu vasitəsilə USAID-dən alınan vəsait hesabına bölgələrdə müharibədən zərər çəkmiş şəxslərə, şəhid ailələrinə və Qarabağ qazilərinə pulsuz hüquqi yardım göstərilib. Bu fəaliyyətlə bağlı materialların rəhbərlik etdiyi təşkilatın saytında yerləşdirildiyini və bir hissəsinin məhkəməyə təqdim olunduğunu deyib. Süleymanlı həmçinin bəzi dövlət qurumlarının da USAID-dən vəsait aldıqlarını məhkəmənin diqqətinə çatdırıb.