Milli Şuranın Koordinasiya Şurasının üzvü Gültəkin Hacıbəyli 72 gün saxlanıldıqdan sonra Türkiyədən Azərbaycana deportasiya edilib. Deportasiya gecə saatlarında həyata keçirilib.

Hacıbəyli ötən il noyabrın 29-dan 30-na keçən gecə İstanbulda yaşadığı evdən polis tərəfindən saxlanılaraq Çatalca Geri Göndərmə Mərkəzinə yerləşdirilmişdi. Onun barəsində Türkiyə qanunvericiliyinə uyğun olaraq G-82 məhdudlaşdırma kodu tətbiq olunmuşdu. Bu kod milli təhlükəsizlik üçün təhdid hesab edilən xarici vətəndaşlara şamil edilir, onların ölkəyə girişinə qadağa qoyulmasını və deportasiya olunmasını nəzərdə tutur.

Dövlət satınalmalarının vahid internet portalında dərc olunan məlumata görə, “Laçın rayonunda Bərpa, Tikinti və İdarəetmə Xidməti” publik hüquqi şəxsi 72 000 manat dəyərində piano alışı ilə bağlı müqavilə bağlayıb. Satınalmanın qalibi “All Star” MMC olub və prosedur “bir mənbə” üsulu ilə həyata keçirilib.

Açıq mənbələrdə yerləşdirilən məlumatlara əsasən, Azərbaycanda akustik pianoların qiymətləri adətən 5 000–15 000 manat aralığında dəyişir. Bu baxımdan 72 000 manat məbləğində satınalma bazar qiymətləri ilə müqayisədə xeyli yüksək görünür. Qiymət fərqi konkret model, istehsalçı marka, eləcə də çatdırılma, quraşdırma və digər xidmət xərclərindən asılı ola bilər. Portalda isə pianonun markası və texniki xüsusiyyətləri barədə ətraflı məlumat təqdim olunmayıb.

Azərbaycan Xalq Cəbhəsi Partiyasının (AXCP) həbsdə olan sədri Əli Kərimlinin hüquqlarını müdafiə etmək məqsədilə komitə yaradılıb. Bu barədə partiya çərşənbə axşamı məlumat yayıb.

Bildirilib ki, komitə fevralın 4-də ilk iclasını keçirib və tarixçi Cəmil Həsənli ilə hüquq müdafiəçisi Leyla Yunus həmsədrlər seçiliblər.

Komitənin tərkibi həm ölkə daxilində, həm də xaricdə yaşayan ictimai və siyasi xadimlər üçün açıqdır. İlk iclas zamanı komitə həmçinin ilk bəyanatını qəbul edib və Əli Kərimliyə qarşı irəli sürülən ittihamları siyasi motivli adlandırıb.

ABŞ-ın German Marshall Fund (GMF) təşkilatında Azərbaycan üzrə keçmiş müşavir olmuş Mehriban Rəhimlinin məhkəmə prosesi ölkədə “QHT işi” kimi tanınan davam edən cinayət istintaqı çərçivəsində başlanır.

İşə Bakı Ağır Cinayətlər Məhkəməsində hakim Namiq Kərimovun sədrliyi ilə baxılacaq. İlk məhkəmə iclası 11 fevral tarixinə təyin edilib.

Mehriban Rəhimli 24 mart 2025-ci il tarixində rəsmi olaraq istintaqa cəlb olunub və barəsində polis nəzarəti qətimkan tədbiri seçilib. O, daha əvvəl GMF-də Azərbaycanla bağlı məsələlər üzrə müşavir vəzifəsində çalışıb.

Azərbaycan Ali Məhkəməsi çərşənbə axşamı həbsdə olan həmkarlar ittifaqı lideri Afiəddin Məmmədov və ictimai fəal İlhamiz Quliyevin kassasiya şikayətlərini təmin etməyərək onların həbs cəzalarını qüvvədə saxladı.

“İşçi Masası” Həmkarlar İttifaqları Konfederasiyasının sədri olan Məmmədov 20 sentyabr 2023-cü ildə həbs edilib. Ona Cinayət Məcəlləsinin bir neçə maddəsi ilə — xuliqanlıq niyyəti ilə qəsdən sağlamlığa ağır zərər vurma, silahla xuliqanlıq və qanunsuz silah saxlama ittihamları irəli sürülüb. O, ötən ilin 14 yanvar tarixində 8 il müddətinə azadlıqdan məhrum edilib.

Ali Məhkəmədə keçirilən iclas zamanı onun vəkili Zibeydə Sadıqova aşağı instansiya məhkəmələrində təxminən 20 vəsatət təqdim edildiyini, lakin onların heç birinə baxılmadığını bildirib. Məmmədov özü də məhkəmədə prosesin ədalətli aparılmadığını qeyd edib.

Yanvarın 28-də Siyasi Menecment İnstitutunun həbsdə olan direktoru, siyasətçi Azər Qasımlının cinayət işi üzrə növbəti məhkəmə prosesi keçirilib.

Bakı Ağır Cinayətlər Məhkəməsində hakim Telman Hüseynovun sədrliyi ilə baş tutan iclasda Azər Qasımlını hədə-qorxu ilə tələb etmədə ittiham edən Qurbanəli Yusifovun keçmiş həyat yoldaşı Fərəhbanu Yusifovanın iştirakı təmin olunmayıb. O, müdafiə tərəfinin əvvəlki vəsatəti əsasında şahid qismində ifadə verməli olsa da, bu dəfə də məhkəməyə gəlməyib.

Bununla bağlı Azər Qasımlının vəkili Rövşanə Rəhimli şahidin məhkəməyə məcburi qaydada gətirilməsi barədə vəsatət qaldırıb. Məhkəmə müşavirədən sonra vəsatəti təmin edib.

Yanvarın 26-da Bakı Ağır Cinayətlər Məhkəməsində hüquq müdafiəçisi, "Müdafiə Xətti" hüquq-müdafiə təşkilatının icraçı direktoru Rüfət Səfərova qarşı açılmış cinayət işi üzrə növbəti məhkəmə iclası keçirilib.

İş materiallarına əsasən, zərərçəkmiş qismində tanınan Natiq İmanquliyev bildirib ki, torpaq sahəsi almaq üçün Səfərova 60 min manat verib, lakin torpaq sahəsi alınmayıb və pul geri qaytarılmayıb. O, həmçinin iddia edir ki, 3 dekabr 2024-cü ildə aralarında yaranmış mübahisə zamanı xəsarət alıb. Lakin müdafiə tərəfinin suallarını cavablandırarkən, o, fiziki qarşıdurma olduğunu desə də, Səfərovun üzərində hər hansı xəsarət izlərinin olmamasını izah edə bilməyib. Zərərçəkmiş xəstəxanada tibbi müayinədən keçmədiyini də təsdiqləyib ki, bu da iş materiallarında olan tibbi rəyin əsasları ilə bağlı müdafiə tərəfinin suallarına səbəb olub.

2020-ci ildən etibarən, 2026-cı il də daxil olmaqla, işğaldan azad edilmiş ərazilərin bərpası və yenidən qurulması üçün dövlət büdcəsindən 25 milyard manatdan artıq vəsait ayrılıb. Lakin bölgə sakinlərinin sosial şəbəkələrdə paylaşdığı video və görüntülər bir sıra tikinti və infrastruktur layihələrinin keyfiyyətsiz icra olunduğunu göstərir.

Yayılan materiallardan görünür ki, intensiv yağışlar zamanı su yeni tikililərin yalnız zirzəmilərinə deyil, birbaşa mənzillərə dolur, yol kənarındakı hasarları uçurur, asfalt örtüyünü yuyaraq yol səthində çalalar və xəndəklər yaradır. Yerli sakinlər bu problemləri dəfələrlə ictimailəşdirsələr də, onların sözlərinə görə, faktiki olaraq heç bir araşdırma aparılmır, məsul şəxslər cəzalandırılmır. Ən yaxşı halda mövcud qüsurlar yalnız cari təmir işləri ilə aradan qaldırılmağa çalışılır.

2025-ci il dekabrın 26-dan etibarən Bakı məhkəmələrində xaricdə yaşayan azərbaycanlı bloqerlər barəsində qiyabi hökmlərin elan olunması davam edir. Məhkəmə qərarlarına əsasən, Qabil Məmmədov 16 il, Qurban Məmmədov və Tural Sadıqlı 14 il müddətinə azadlıqdan məhrum ediliblər.

Həbsdə olan “Meydan TV” əməkdaşları “Euronews” telekanalına açıq müraciət ediblər. Müraciətdə Azərbaycanda müstəqil mediaya qarşı son illərdə həyata keçirilən sistemli təzyiq və repressiyalara diqqət çəkilir.

Jurnalistlər bildirirlər ki, 2022-ci ildə beynəlxalq konvensiya və standartlara zidd olaraq qəbul edilmiş, həmçinin Venesiya Komissiyasının mənfi rəy verdiyi mürtəci “Media haqqında” qanundan sonra ölkədə müstəqil media və jurnalistlərə qarşı təzyiqlər total xarakter alıb.

Qeyd olunur ki, 2023-cü ildə “Abzas Media” əməkdaşlarının həbsi və redaksiyanın bağlanması ilə başlayan proses 2024-cü ildə “Toplum TV” və “Meydan TV” əməkdaşlarının həbsi ilə davam edib, bu media qurumlarının ofisləri də fəaliyyətini dayandırmağa məcbur edilib. Azadlıqda qalan az sayda jurnalistlərin bir qismi siyasi təzyiqlər səbəbindən ölkəni tərk edib. Ölkədə qalan jurnalistlərin bir hissəsinə ölkədən çıxış qadağası qoyulub, digərləri isə hələ də istintaq altındadır.